॥श्री॥ जयदेवा योगेश्वरा । विनायका गुरुवरा ॥

आरती ओवाळीतो । प्रेमाच्या माहेरा ॥धृ॰॥

लोपला वेदमार्ग । लया ब्राह्मण्य गेलें ॥

सोडुनी स्वाभिमान । परबुद्धि झाले जन ॥१॥

हीन दीन दशा आली । दुजी आशाच नुरली ॥

देवाच्या कृपेंवीण । दैवहीनां नुमजें तें ॥२॥

जाणुनी पुण्यग्रामीं । महाराष्ट्र पुण्यभूमी ॥

ब्राह्मण्य मूर्तिमंत । दावियेलें आचरोनी ॥३॥

गायत्रीमंत्रराज । व्यक्त दाखवीलें बीज ॥

जीव हा विश्वकाय । स्वयं ब्रह्मचि केवळ ॥४॥

परमात्मा गुरुमूर्ति । नरसिंहसरस्वती ॥

सच्छिष्य रहाटीनें । प्रार्थिलें जन्मवरीं ॥५॥

सकळां अंतर्यामीं । पूर्ण प्रगट व्हावें ॥

हीनती सर्व जावीं । इहपर मुक्तीसी द्यावें ॥६॥